Ютка [Антон Алешка] (fb2) читать онлайн

- Ютка 190 Кб, 17с. скачать: (fb2)  читать: (полностью) - (постранично) - Антон Алешка

 [Настройки текста]  [Cбросить фильтры]

Антон АЛЕШКА


ЮТКА


I.

Сярод яравых палеткаў ідзе Ютка і зажмурана пазірае ўперад. На ім старая, калісці сіняя, а цяпер вылінялая, рубашка з подраным перадам матляецца рубцамі па гэткіх жа самых портках. У руках вішнёвае пужальна. На ім накручана доўгая пуга, звітая з канапель-пласкуння. Твар загарэла-чорны, маршчыністы, аброслы. 3-пад старое шапкі сівізною свецяць скроні. У маршчакаватых прарэзах павек, пад навіслымі запыленымі брывамі глыбока сядзяць жалудовага колеру вочы. Уся яго каржакаватая постаць з доўгімі цэпкімі рукамі і кароткімі лукаватымі нагамі быццам зроблена з нейкага шэрага матэрыялу, але гэты матэрыял мае каменную цвёрдасць.

Глядзіць ён уперад, туды за грудок, адкуль відны прысады вёскі. Сама вёска зеленню садоў нікне ў сінявай далечыні rapaчага ліпнёвага дня.

Спяшае Ютка дамоў, бо чараду пакінуў на аднаго падпаска: трэба хутка вярнуцца, бо добра, як пагода будзе стаяць увесь дзень, а калі дождж? Не ўтрымае малы чарады і свінні разбягуцца, каторае куды: па пасевах, у гароды — наробяць шкоды. А там і пашлі нараканні на пастуха, лаянкі, а мажліва і апанятаванне папсаванага гарода, ці там якое збажыны.

Хата была замкнёна. Прасунуўшы руку ў вакенца, Ютка пацягнуў за вяровачку, і засаўка з піскам стукнулася аб прабой. Клямка адскочыла і дзверы самі адчыніліся. 3 сянец дыхнула халадком і пахам вялага пакрышанага зелля-малачаю, што ляжала ў кучы пад сталом. Напіўшыся халоднага рэзкага квасу, Ютка абцёр далонню вусы і бараду. Увайшоў у хату, большую палову якой займала пахіленая ў чалесніках і абкураная, даўно не беленая, печ. На палу былі раскіданы лахманы рознае адзежы. Ютка старанна ўзяўся наводзіць парадак у хаце; знайшоў дзяркач, вымеў смецце, зачыніў падпечак, кінуў на плот гародчыка кош і паставіў у парадак пад лаўкай у мыцельніку чыгуны і гаршкі. Лахманы на палу ссунуў у куток і прыкрыў дзяружкаю. У гэты момант вярнулася нявестка. Сунялася ў парозе і пазірала узяўшыся аберуч за вушэкі дзвярэй, на стараннага свёкра.

— Ты прышла? — звярнуўся да яе Ютка.

— Што ты мне тут парадкі свае наводзіш? Сама прыбяру.— Яна шырока ступіла ў хату і павесіла на вешала ляжаўшую на лаве хустку.

— То чаго ты? — пазіраў Ютка на нявестку, чамусці сёння гэткую злосную.

— Чаго? Ты ўсё чагокаеш. А не ведаеш...

— Добра. Няма мне калі тут з табою гаманіць. Ты памыла маю сарочку?

— 3 сарочкаю сляпіцаю прыплянтаўся! — закрычала, усхапіўшыся з лавы, нявестка.— У галаве мне твае сарочкі. Я, думаеш, ішла сюды, каб табе сарочкі мыць? К чортавай мацеры з сарочкамі!.. 3 байструком тваім, які мяне маладую загубіў, — крычала яна.

— От як?

— А што ж. Людскія нявесткі з гаспадарамі жывуць, а я, як тая салдатка — кінуў і паехаў.

— Не дзе дзенецца — прыедзе.

— Прыедзе... добра табе слініць.

— Дык выбірайся к чорту, не паскудзь хаты!

— Не ты браў, не ты й выганіш.

Ютка вышаў на двор; узапершыся на плот, пазіраў у гародчык. Злосць варушылася ўнутры і па крысе падымалася ўверх. Прайшоў пад вароты ў садок, гэткай жа вялічыні, як і гародчык — паўзагона ўсяго; пазіраў у канец яго пад навозы, дзе калісці ставіў гумно. Зашчаміла болем нутро пры ўспаміне. Ён кінуў думаць і вярнуўся ў хату.

— Дай сарочку — пайду я.

— За кублам ляжыць.

Выцягнуў Ютка з-за кубла чорную ад бруду сарочку, кінуў сярод сянец і злосна закрычаў:

— Гэта так? — паказваў, узяўшы на пугаўё брудную сарочку.— За гэта я цябе хлебам кармлю, гультая ты кусок?

— Каб я ела твой хлеб, то даўно ўдавілася-б,—не ўстаючы з месца, кідала словам} нявестка.—Сказала мыць не буду, і не буду.

Згарнуушы сарочку і абкруціўшы яе пугаю, Ютка стукнуў дзвярыма.

— Каб па тэты дзень я тут цябе бачыў!—і пашоў вуліцаю ў канец. Нявестка яшчэ нешта крычала ў хаце, але ён не чуў.

***

За мастком, каля самае дарогі, суняўся Ютка ля чарады, якую пасвіў Сапрон. Стаялі яны і пазіралі на свіней, якія на гарачыні сланяліся ад мяжы да мяжы. Старыя злосна падкорпвалі лычам надаедліва прыставаўшых парасят.

— Дык от бач жа — нявестка,— скардзіўся Ютка.— I мыць не думаю — сказала. Чорт тваю галаву бяры, сам памыю... Гультая кусок.

— Гавораць пра яе нядобрае,— пачаў Сапрон.— Па вечарах, браце ты мой, хіхікае з хлопцамі. Ну, ці гэта ж хораша маладзіцы?

— Вось яно...

— Але ж. Гэтакі і ён, браце мой, кінуў маладую жонку, а сам паехаў. Куды? Чаго? Тут мала месца? А ўсё дурасць. Цяпер яна і...

Ютка маўчаў. Зразумеў, чаму яна гэтак зразу закапыліла нос. „І ашукаўся, што зразу не прагнаў суку" — падумаў Ютка.

— Маладосць дурная.— цяг скрыпучым голасам Сапрон.

— Усё тут,— сказаў Ютка і пашоў па траве паўз дарогу.


II.

Паўстае перад намі жыццё Юткі, скупое на прыгоды, на вясёлыя хвіліны, як гэты зрыты свіннямі і абабіты авечкамі папар на траву. Ажаніўся Ютка з тэй, якую моцна кахаў. Узяў сабе ён Петракову Ганну. Толькі чамусці праз пяць з паловай месяцаў пасля вяселля нарадзіўся ў іх сын. Маўчаў панура Ютка, нічога не казаў Ганне. Яна таксама маўчала і ўкрадкам пазірала на мурлаватага гаспадара — ці не запала што нядобрае ў яго злоснае нутро? Але гэтак цягнулася не доўга. Тыдняў, мусіць, праз два вышла, як на чыстую ваду. Сябры Юткавы віншавалі яго, як вельмі паспешнага чалавека, а за вочы смяяліся да хрыпот і кашлю.

Старыя жанчыны хутка знайшлі канцы такіх скорых радзін у Юткавае Ганны. Цяпер уся веска гаманіла, што сапраўдным бацькам яе сына з'яўляецца Вульф — панскі агароднік.

Пачалі ўспамінаць, што калі Ютка вадзіў Бенсявы коні на начлег, то Ганна падоўгу бавілася з Вульфам у садзе, каля будкі, што Пячкуровы хлопцы нават былі падслухалі размову і бачылі, як Вульф сваімі чорнымі вусікамі казлытаў Ганніну шчаку.

Полымем шыбанула злосць, аж затрэслася ўсё ў сярэдзіне ў Юткі. Схапіў ён на плоце кавалак вужышча, адрэзанага на пастронкі, намачыў у цэбры і, паваліўшы Ганну сярод хаты, счарніў ёй сцёгны і лыткі. Пасля наматаўшы на руку растрэсеную касу, біў у патыліцу і ў плечы. Крычаць Ганна не кры­чала, а толькі поўзала ля ног і прасілася.

— Асіроціш Грышку... не забі хаця.

Стукнуўшы яшчэ раз ногцам у бок, Ютка вышаў на двор. Цэлы тыдзень потым не заходзіў у хату. Прымайстраваўся ў сенцах на тапчане і сяк-так праводзіў кароткую летнюю ноч.

Паволі прайшоў першы сорам. Агураў Ютка, абабіўшыся аб людскія языкі. Таксама і сэрца не камень — адышло. Жыў ужо з Ганнаю так, як яно і трэба, але ўсё ж не тое. Бачыў, што ў глыбіні васільковых яе вачэй таілася нешта чужое. Спачатку злаваўся, а потым на гэта глядзеў так,— абы было ціха.

Праходзіў час. Рос Грышка ваўчанём тым дзікім. А калі пачаў выходзіць на вуліцу да гурту дзяцей, яны сустрэлі яго градам пісклівых галасоў:

— Байструк! БайструкІ

Пакаціўся Грышка каля варот, бягучы дамоў; стомлены, ухапіўся рукой за матчын фартух, пазіраў ёй у твар.

— Чаму яны крычаць на мяне — байструк?

— Бо дурні. На дварэ гуляй, сыночак, да іх не хадзі.

Больш нічога яму не сказала; пагладзіла па галоўцы і выправіла гуляць на двор.

***

Хутка здарылася нешта нечаканае. Паабедаўшы і адыходзячы на работу, Ютка сказаў:

— Прышоў да нас нейкі з горада. Вылез з кустоў, як мы касілі, і казаў, што ўсюды кінулі працаваць па маёнтках. Паляць палацы, расцягваюць ўсё. Мусіць і мы заўтра пакінем працу.

Праз дзень пачалася, як дзед Касач казаў „слабода". Як адзін на працу ў маёнтак не пашлі. Патрабавалі аплаты за працу з самае вясны і павялічэння платы на касьбе і ў жніво. Па вечарах зарніцамі свяціліся стагі, будынкі. Рабілася гэтак не толькі вось тут, а і ўсюды навокал. Знік пан.

3 трэскам валіўся панскі лес, у які да гэтага часу і па лом забаранялася ездзіць. У сажалцы наперабой лавілі рыбу, хто таптухай, хто крыгай, а хто проста кашом ад бульбы. Адчынялася „слабода" сапраўды. Хадзілі розныя чуткі аб падзеях ў гарадах; толкам ніхто нічога не ведаў.

Але аднае начы наехала шмат стражнікаў, а з імі з'явіўся і пан. Прышлося адказваць за гэтую „слабоду" не аднаму чалавеку з вёскі. Іх павязалі і пакідалі ў стайню. А потым аддалі на суд, і развіталася шмат старых і хлапцоў з роднаю вёскаю.

Стаяла заплаканая Ганна, праводзіла свайго Ютку з жалем, сціснуўшым сэрца. Што яна цяпер будзе рабіць? Дзе яна дзенецца?

Плакаў і Грышка, нават добра не ведаючы ў чым справа.

Грышку забраў Ганнін бацька — яго дзед. Хоць і там не смак, хоць і там дзетвары, як саранчы, але усё ж...

Ганна ў жніво хадзіла ў заработкі ў маёнтак. Зарабляла няшчасны грош, няшчасную сухую скарыначку, каб хаця падтрымаць гэтакую няшчасную жытку. А гады ішлі. Яны слаліся шэрым аднастайным палотнішчам з калі не калі маленькімі пробліскамі святлейшага.

Праз пяць гадоў вярнуўся Ютка. I, здаецца, праз год, а можа крыху і болей, нарадзілася дзяўчынка з гэткімі ж вачыма, як у Ганны. Але Ганна зразу залягла і болей не ўставала. Чырвоная ўся, з пабялелымі губамі, у апошні раз пазвала Ютку. Закінула яму на шыю абцяжэўшую руку, прыцягнула к сябе блізка-блізка твар яго і, не маргаючы, доўга ўзіралася, нібы пазнавала.

— Ютка... глядзі Грышку...

Пабялелыя губы дрыжэлі. Намагалася яна яшчэ нешта сказаць, ды не здолела.

Праз два дні на руках у цешчы сканала і дзяўчынка.

Астаўся Ютка з Грышкам. Перабіваўся з лебяды на квас. Потым загрымела, загуло, перамяшалася ўсё. Знікалі людзі, вёскі — усё глынала вайна. Хваляй гэтай захапіла і Ютку і кінула на фронт.

Праз гады два ўсё ўлягавалася і Ютка з Грышкам, згубіўшы свой кавалак зямлі, які падабраў пад сябе Бенсь, засталіся ні з чым. Сталі пасвіць вясковую чараду. За цэлае лета цеганіны за чарадою яны зараблялі на зіму і гэтак жылі.


ІІІ.

Як жа гэта так? — гаманіў сам з сабою Ютка.— Людзі пакрысе абжываюцца і жывуць, а я? Глыбока запала яму думка — завесці гаспадарку. Калі дзялілі панскую зямлю, то і яму прышлося нешта дзесяцін чатыры. Але чым ты яе абробіш, калі нават лапавухага каняці няма? Дзе зложыш сабранае з гэтай зямліцы, калі і драхлае варывенькі няма? Тут Ютка і парашыў цвёрда-нацвёрда купіць такі-сякі зруб і паставіць хоць невялічкае свае гуменца.

Гэта будзе зроблена ў адзін год. У другі купіць каняня якое. Вось гэтак і акрыяе, стане гаспадаром, і глядзі, што ўжо пуга непатрэбнай будзе.

Пасля доўгай тупаніны Ютка купіў у Бенсяў старэнькую варыўню. Сам Бенсь, візкі, хрыпаты чалавек, хваліў без меры гэтую гніль, водзячы наўкруга Ютку.

— Ты зірні толькі! Кхэ... кхэ... 3 яе будзе ладнае гуменца, — і пазіраў маленькімі хітрымі вочкамі на Ютку, які нешта тут жа рахаваў, пазіраючы на старую паабдзіраную страху.

— Дарагавата, суседзе,— казаў Ютка, трымаючыся за паясніцу.

— Што ты — дорага! За яе не гэтулькі вазьму з чужога. Але калі суседу — скінуў.

Бенсь адышоўся і сеў у садзе на лаўцы пад грушай.

„Пастушыдла абдранае! Лепшага ты нідзе не знойдзеш. Табе і гэта ў самы раз",— думаў ён, гладзячы рэдкую сівую бародку.

— Дык як, суседзе? — падышоў Ютка.

— Гэтак і будзе.

— Дарагавата,— пачаў Ютка, але Бенсь яго перабіў:

— Нічога не дорага! — 3 твару зразу знікла ўхмылка і ён, гледзячы на платы гародчыкаў, працягваў: — А калі табе не пад сілу — як сабе хочаш.

Бенся добра ведаў Ютка і паспяшыўся, каб не ўгнявіць.

— Няхай будзе гэтак.

— Сама лепш,— сказаў, устаючы, Бенсь.— А раскідаць мае хлопцы памогуць.

Вышаў за браму Ютка з лёгкай радасцю ад таго, што гумно ўжо ёсць. Бенсь, праўда злупіў не шкадуючы: дваццаць пудоў жытам і зімою Ютка павінен з Грышкам дапамагчы малаціць. Сабраўшы ўсё гэта разам, можна было і новае гумно купіць, але Ютка махнуў рукой.

— Дзе мае не гінула.

Увосень варыўня была перавезена на Юткаў пляц, і ў канцы садка быў зложаны зруб. Па людзях кідаўся Ютка, даставаў нехватаўшых ключоў і пруцця, як Бенсь, сустрэўшыся, пачаў яму выгаварваць:

— Я не думаў, што ты такі свінаваты чалавек.

— Чаму?

— А дваццаць пудоў калі аддасі?

— Суседзе, дарагі, на гэтым тыдні збяру і аддам.

Вінаватае з цяжкасцямі прышлося аддаць.

Была звонкая марозная раніца. Асенняя гразь грузакамі змерзлася і зямля, выставіўшы цвёрдую шурпатую грудзіну, прагна чакала снегу. Чырвоным кругам тулілася сонца над лесам, аглядала навакольную пустэчу і цішыню палеткаў.

Перакінуўшы нагу за ключ, Ютка сядзеў верхам і перавіваў — прывязваў пруты да ключоў скручанымі дубцамі вербалозіны. Па гумно прыбег Грышка.

— Тата, Бенсь малаціць заве.

— Сёння часу няма. Скажы, што заўтра прыдзем.

Выгіналася ў руках скручаная распараная вербалозіна.

Ютка спрытна абхопліваў прут з ключом, заваратнем закручваў і падтыкаў хвасты, каб не тырчэлі. Цешыўся Ютка адзінаю думкаю, якая апанавала яго ў апошні час — зрабіцца гаспадаром.

3 такою думкаю скончыў пруціць адзін бок, пачаў наключваць і другі.

На змярканні здарылася тое, чаго Ютка і не сніў. 3 навозаў да яго гумна пад'ехалі тры падводы і суняліся на прыгуменку. Двое мужчын узлезла на зруб. Адзін перасёк тонкі прут, што каля сволакаў, а потым разам пачалі скідаць перапручанае ключаўё на зямлю.

Ютка якраз ішоў ад калодзезя. Убачыўшы, што сякуць пруты, ён паставіў вядро з вадою, пабег да гумна.

— Што вы робіце? — крыкнуў ён, падбегшы.

— Гультая прывучаем да работы,—адказаў старэйшы сын Бенся.

Ютка схапіў папруціну і кінуўся на самога Бенся.

— Што робіце, пытаюся?!

— Э-э чалавеча, дык ты гэтак?! Злезь, Бонік, ды цярні яму, каб аж юха пацякла.

Бонік саскочыў далоў і, схапіўшы Ютку за плечы, марськануў у бок. Грукнуўся Ютка бокам аб вугал, што аж нешта у сярэдзіне ёкнула. Выпрастаўшыся, адскочыў у бок ад вугла, увільнуў ад настаўленых рук Боніка, схапіў аскабалак і агрэў яму па патыліцы. Адчуваў у сабе моц Ютка, але калі Бонік насеў на яго сваім цяжарам, прыдушыў да зямлі, стукнуўшы некалькі разоў кулаком па сківіцах, пачуў, што ў плячах нешта моцна забалела. А стары Бенсь вылузаў пасак з-пад сядзёлка і завязаў яму рукі назад.

— Галапупак! Нешта вельмі гарачы стаў! — con стары Бенсь.— Пусці, Бонік, хай пакачаецца.

На крык прыбеглі людзі, развязалі Ютку, але здаровыя Бенсевы сыны і зяць расцягвалі зруб і клалі на вазы.

***

Амецямі аўсянымі шамацяць прусы ў запечку. Аднастайна ціхенька сыплецца іх шэмет і, калі добра прыслухаешся, то забываешся, дзе ты, паволі спускаешся ў ціхі смачны сон. Праз шыбы вакна на зямлю хаты падае мыльная пляма святла месяца, а на страсе хаты суседа іскрыцца дыяментам выпаўшы снег.

Гэтак жа ціха скрыпае, абвесіўшы мёрзлае галлё, сліва, стоячы у гародчыку. Чутна калі ні калі, як скрыпае снег пад нагамі ў прайшоўшага па вуліцы чалавека, або працяжны піск палазоў праехаўшага.

Нічога болей не далятае да Юткавых вушэй. Ляжыць ён ніц на лахманах, пасланых на палу. Ужо от каторы дзень баляць плечы каля лапаткі і бок.

Памаленьку ён пераварочваўся, выбіраў, як лепш легчы і, сцішыўшыся, пралежваў дні і ночы.

Чэзнуў гэтак, качаючыся на палу, аж цэлы тыдзень. Потым па крысе пачаў хадзіць па хаце і вышкрабаўся.

От у гэты момант адчуў сябе Ютка гэтак, як адчувае жура­вель з перабітым крылом, калі ён не можа ўзняцца, а тут бягуць дзеці і ловяць яго. Планы і меркаванні разляцеліся пухам на ветры-буры. Колькі дапамагаў ён Бенсю, колькі слухаў яго. А ў падзяку за ўсё добрае гэты сусед яго маслам памазаў па ягонай жа скуры. Гуменца забраў назад, а за адданае жыта звярнуў пазадкамі.

Пакараў суд Бенсю за пабоі, але не залячыў цалкам Юткавай крыўды. І не было ў яго больш упэўненасці, што ён здолее завесці сваю гаспадарку. Узяўся Ютка зноў за пугу.


IV.

Лета змянялася зімою, зіма — летам. Звінелі дзявочыя песні, перасыпаныя вясёлымі галасамі хлапцоў. Слухаў іх клён, натапырыўшыся, узлёгшы ралінаю на плот.

На гэтых пагулянках моцна пакахаў Грышка Канцавую Алесю. Вочы колеру зацвіўшага лёну і гібкі пружыністы стан яе, мяккія валасы, заплеценыя ў даўгую касу, прыцягвалі да сябе. А голас... Калі толькі ён далятаў да слуха, стукалася сэрца злоўленай птушкай, і аднэй хвіліны без яе быць не мог.

Сёння яны сядзяць воддаль ад гурта на лаўцы, каля пахіленага плота. Блізка прыхіліўся Грышка да Алесі, моцна прыгарнуў яе да сябе.

Горача дыша ей у твар і высахлымі ад смагі rv6aмi шэпча на вуха:

— Ведаеш даўно, што кахаю. Ну, дык чаго? У суботу ў сваты прыду.

— Што ты, Грышка!

— А чаго?

— Ну як гэта зразу?

— Абрыдла так жыць, Алеся.

Яшчэ бліжэй прыгарнуў да сябе і пазіраў ёй у вочы, якія ледзь блішчэлі у цемры.

— Дык як?

— Пусці! Зараз мяне ў блінец расціснеш.

— Нічога. Але!..

I Іічога я табе не скажу, во! — знячэўку вырвалася з яго рук, падскочыла лёгка і, адбегшыся, стала папраўляць хустку.

— Што? Значыць не хочаш? — пытаў пакрыўджаны Грышка.

— Чалавек два вухі! Надумаў! — Лёгка схапіла за шыю і ён, мусіць, першы раз, пачуў, як яна глыбока ўздыхкула, што аж скалануліся высокія, тугія грудзі.

— Хадзем у гурт.

— Што мне гурт?

Адышоўшыся крыху, убачыла, што Грышка зноў сеў на лаўцы. Вярнулася.

— Можа румзаць пачаў? — заглянула яму ў твар Алеся. — Бач, дык ты ўжо і засердаваў.

Радзеў змрок. На вуліцы яскрава вырысоўваліся платы гародчыкаў. Тухлі зоры. Прыпёршыся ў весніцах, пазіраў Грышка уздоуж вуліцы.

— Гэтак і будзе.

— Даражэнькі, крышку пачакай. Ты неяк зразу.

Болей нічога не сказала Алеся. Яна ні то засаромелася, ні то зжахнулася раптоўнасцю, але аб сватах і ні блізка. Усё ж вясёлым вярнуўся Грышка.

А нешта праз зіму перад самаю ўжо вясною згуляў вяселле, перабраў да сябе Алесю з пасагам і ўзяўся старанна за гаспадарку. Ютка пасвіў на засценку ў трох кілометрах ад вёскі.

На другую вясну увалілася пошасць — пачалі дохнуць коні. Грышкава пасажаная жарабіца пастаяла дзён два, абвесіўшы вушы, і перакулілася. Плюнуў Грышка на ўсё, сабраўся і паехаў на заработкі. Алеся засталася жыць адна. Абрыдла ёй адзінокае жыццё горш паранае рэдзькі. Хоць і цешыў Грышка ў лістах, што скора прыедзе і забярэ з сабою — не верыла. Прайшло ўжо два гады, а ён усё едзе.

„Пакінуў,— думала яна.— Гэтакі чорнамазы, кучаравы... Пачапілася якая-небудзь стрыжаная, дык і на мяне забыўся".

Ад гэтага сёння і пасварылася са свёкрам. Вельмі горна стала, а ён яшчэ стаў парадкі свае наводзіць.

***

Плюхае Ютка ў вадзе, падкасаўшыся па калені. Моцна стукае мокраю бялізнаю па аброслых лытках. Яго і не відаць, толькі плёскат чуваць з-за кустоў, што каля кладкі. На беразе сядзіць падпасак, успёршыся на локаць, пазірае на свіней, што валяюцца ў гразі.

А сонца пячэ.

З-за кустоў, у белых портках і кашулі, з вудамі ў руках выходзіць тутэйшы засцянковы рыбак Берасневіч. На твары відзен камячок вусоў ды барада, а рэшта — чырванаватая пляма з аблушчанай скурай. Моргае ён дробненька, палажыўшы вуды, доўга прыглядаецца, хто там плешчацца ў вадзе і, пазнаўшы, вітаецца.

— Берасневіч, добрае здароўе! — адазваўся Ютка.

— Што гэта робіш? — запытаў Берасневіч тоненькім галаском, пазіраючы на Ютку.

— А от жа бачыш.

— Я то бачу — анучы мыеш?

— Не дабачваць стаў, трэба акуляры.

— Яно то гэтак.

Берасневіч тут жа пахваліўся тым, што ў яго ёсць акуляры і вельмі добрыя, але адно шклечка вывалілася, калі на седале лавіў курыцы, і ніяк ён не можа знайсці майстра, які б падручыўся наладзіць іх. Панюхаў тоўчанае самасадкі, два разы чхнуў, прыгнуўшыся к траве, і паглядзеў на сядзеўшага падпаска.

— Можа сын?

— Ды не,— расцілаючы на траве сарочку, адказаў Ютка.

— Ага. Ну, але сына маеш?

— Ды яго дома няма.

— А дзе ён?

— Быў на Данбасе,— адкасваючы калошы, расказваў Ютка.— А цяперака, надоечы прыслаў ліст, то ўжо пераехаў на завод. Лінградскі... не, не Лінградскі. Як ён завецца... от забыў. Як зваць намесніка Леніна? — звярнуўся да падпаска.— Ты павінен ведаць.

— Сталін.

— Во — Сталін. Сталінградскі завод празываецца. Там, піша, трахтары будуць рабіць скора, во. Збегай, Міця, завярні, а то палезла рыць,— паказаў ён на свінню.— Ніяк не можа паляжаць.

— От як яно.

— Але. Ажаніўся, пажыў год і паехаў у зарабаткі, а жонка мне цяпер быту не дае.

— Ну але...

Берасневіч узяў вуды і дробненька падрабязіў паўз рэчку на дарогу.

Апошняе, што сказаў Сапрон пра Алесю, моцна ўзварушыла Ютку. „Папрашу, каб напісаў аб усім падробна яму. Хай што хоча, тое робіць з ёю; няма чаго сарамаціць мяне перад людзм!"— думаў Ютка, пазіраючы на падпаска, што мачыў ў рэчцы пугу.

— Міця-а!

— Чаго?

— Сюды хадзі.

Ютка сеў пад куст. Думаў, што напісаць у лісце да сына.

***

Рыхтаваліся сеяць жыта. Дзве паркі канчалі траіць папарышча. Мужчыны парашылі, што пакуль прыдзе Пуцін, прыараць к гэтаму кавалку канюшынішча некалькі загонаў і на агульным куску сеяць.

Зямля цвёрдая. Пераплялося карэнне канюшыны з пырнікам, хоць зубамі дзяры. Ступае мерна за плугам Васіль. Пройдзе паўзагона, спыніцца аддыхаць. За ім аддыхае парка Алеся. Выцягнуўшы плуг з баразны, Васіль шаруе каменем адвальніцу, ачышчае ад прыстаўшае зямлі. Алесь сядзіць на дышлі плуга, разважае, пазіраючы на палетак.

— Ужо Пуцін мусіць зайшоў. Ты як думаеш?

— Але,— шаруючы, адказвае Васіль.

— Няўжо ў рыку нічога не памогуць? — пытаецца ён у самога сябе, падвязваючы калошу нагавіц.

Памахвае паўднёвы вецер. Растрасае пасмы спацелых валасоў на галаве Васіля, які, стаўшы каленкамі ў раллю, вышароўвае разак.

— Цяпер лягчэй пойдзе,— гаворыць ён, паставіўшы плуг у баразну.— Калі прыаром гэта, колькі будзе? 3 сем будзе...

— Дзіва што будзе. Глядзі, што і больш...

Ютка падышоў з пугаю да хлопцаў, хацеў, мусіць, і сваё слова ўставіць. Але тым не было часу на гаворку. Васіль зайшоў коням наперад, па-гаспадарску выбраў грывы з-пад хамутоў і, вярнуўшыся, у баразну, узяўся за ручкі плуга.

— Но-о! — махае ён пугаю і паволі ставіць ногі ў сырую зямлю баразны. За Васілёвай, выгінаючы спіны, кранулася і Алесева парка.

Ютка глядзіць хлопцам услед і думкі яго круцяцца ўсё вакол таго самага, што ў апошнія дні не дае яму спакою. Хоць бы гэты і Васіль. Ніколі ж каня свайго не меў. А цяпер глядзі ты, як з паркаю ўвіхаецца. Не горш за Бенся. Вунь скіба адвярнулася,— спыніўся, засунуў пальцы ў чорную раллю, перавярнуў уніз травою і нагою яшчэ прытаптаў. Нібы і на сваім шнурку. Мусіць жа чалавек лічыць, што сабе стараецца, а не каму. А Ютку чаго страх бярэ? Лічаныя ж гаспадаркі засталіся не ў калгасе. Праўду такі, мусіць, сын піша... Не разумее Ютка свае карысці. Яго на дабро вядуць, а ён упіраецца, як тая жывёліна неразумная.

Сонца паволі садзілася за грудок. На далёкім небасхіле ўсходу ніклі хмары. Шэрань змроку садзілася на паплавы і на палеткі.

Паволі ехалі дарогаю, сеўшы на адзін воз, Алесь і Васіль.

Каля млына стрэлі Пуціна.

— Ну, як, Мікола? — саскочыўшы з воза, нецярпліва запытаўся Васіль.

— Усё добра, дапамога ёсць.

Пуцін падсеў на аглобіне, і падводы з грудка паехалі весялей.

***

Памяшканне школы паўнюсенька людзей. 3 дзвярэй тарчаць казыркі і вушы шапак, высоўваюцца галовы, стараюцца не прапусціць ніводнага слова.

На твары ў Юткі каплі пота, як гарошыны. Ён аж шапку скінуў і, выцягнуўшы шыю, прыслухоўваецца да роўнага голаса старшыні калгаса Пуціна. За людскімі галавамі часта глухнуць словы і нічога не чуваць. На цыпачкі падымаецца Ютка, прагна ловячы словы.

За сталом сядзіць Мікола Пуцін, узлёгшы на стол доўгім шырокім тулавам і чытае заявы аб прыёме у калгас. Потым звяртаецца да сяброў праўлення і ў адпаведнасці з тэй або іншай агульнай згодай у ражку заявы робіць надпіс і адкладае ў бок. Поруч сядзіць сакратар партыйнай ячэйкі, смуглы, з чорнымі маленькімі вусікамі. Углядаецца ён, прышчурыўшыся ў селяніна, заяву якога чытаюць, часамі нешта гаворыць на вуха Пуціну, а той лёгка ківае галавою і гэтак жа яму адказвае. Сёння прынялі ў калгас шэсць гаспадароў.

— Вось і ўсё,— зірнуў на сядзеўшых старшыня. Мо тут хто хоча падаць, раздумаўшыся, то, от за адным скрыпам разбяром.

Нясмела ўстаў Ютка. Хацеў нешта сказаць, але толькі махнуў рукою. Гэтак засела штосці ў горле, што ні туды, ні сюды. Слова нельга вымавіць.

— Што хоча Ютка?

Утаропіліся вачыма на Ютку. Вельмі цікава, што ён хоча сказаць. Ён трохі адкашляўся і, выпрастаўшыся, стаў у праходзе.

— Хачу, як сказаць, заяву.

— Да стала ідзі. Чаго там стаў? — гукнуў Змітрок.

— Пакажыся, хто ты такі,— з смяшком гаманіў Пятрок.

— I то праўда.

Нехта папхнуў крыху ззаду і Ютка, чапляючыся лапцямі за ногі сядзеўшых, вышаў да стала. Так і цюкнула ўнутры, калі ўбачыў перад сабою гэтулькі людзей. Зусім збянтэжыўся і пачаў выціраць потны лоб кучомкаю.

Аддыхнуўшы крыху, яшчэ бліжэй падышоў да стала.

— Хачу падаць, як сказаць, заяву.

— Але...

— Мацней.

— Што пад нос мармычаш?

3 розных куткоў пасыпаліся галасы, але Ютка, не звяртаючы ўвагі накрыкі, гаварыў далей.

— Але, як сказаць, пісаць я не ўмею.

Старшыня яго прыпыніў.

— Людзі хочуць, каб ты моцна гаварыў. Там вунь заднім не чуваць.

— Ну, але, можна і гэтак. Я, значыць, кажу, што, як ска­заць, хачу заяву падаць. А як усім звесна, пісаць я не ўмею. Дык буду прасіць, каб гэта мяне так.

— Вусную заяву разабраць,— дапамог яму Змітрок, які сядзеў на першай лаўцы.

— Але, умсцвенна, як Змітрок кажа.

— Не умсцвенна, а заяву тваю вусную разабраць,— паправіў Максім каператыўшчык.

— Сераўно... толькі, як сказаць, я хачу ў калгас.

— Ага, добра,— сказаў Пуцін.

Ютка тым часам, крыху ўжо набраўшыся духу, гаварыў далей.

— Усім звесна, хто я такі. Калі я хацеў гаспадарыць, з мяне нічога не вышла. Стузалі мяне, як звесна, Бенсі. А я яшчэ ў пятым годзе стаяў за большэвізму, як сказаць; яшчэ тады стражнікі з мяне спускалі шкуру, падрывалі мае жылле, а за што? За большэвізму стаяў. Значыцца, пяць год на катарзе аддзяжурыў, цюцілька ў цюцільку. Ага. А пасля от з пугаю зарабляў кусок хлеба. Вядома, як піша ў газеце, што такому гаспадару, як мне, толькі і месца ў калгасе. Гэтак сказаў Сталін, а ў яго заводзе мой сын працуе, калі хочаце ведаць, от. Гэта ото ўся мая заява, Але.

— Ты ўсёроўна, як аратар,—падбадзёрваў яго Пятрок.

Усё выказаў. Такі-то разгаварыўся,— гутарылі мужчыны на другім раду.

— Годзе ўжо, сядзь,— пацягнуў Ютку за рукаў Змітрок.— Ужо заявіў.

— Дык як, значыцца? — дапыткоўваўся Ютка.

— Сядзь, пасядзі.

Ютка прысеў каля Змітрака і чакаў, што вырашыць праўленне.

— Прыняць.

Гэта адно слова і пачуў Ютка, што сказаў сакратар партячэйкі. У гэты вечар ён больш не чуў нічога. Нейкая набачная сіла падхапіла Ютку пасля паседжання праўлення і легка паперла перад сабою па вуліцы. Нячутна ішлі ногі. Радасць у ім аж цераз край пералівалася, калі ён суняўся каля сваіх варот. Хоць і быў снег пад нагамі, але адчуў Ютка цвёрдую выбітую сцежку да жыцця.

***

Сёння Ютка вельмі жвавы, чаго даўно з ім не было. Хутка апрануў той кажух без каўняра, узяў дубовую крывульку і пашоў пад школу.

На вуліцы напаткаў Сапрона.

— Куды разагнаўся?

Разгладзіўшы далонню вусы, толькі і сказаў Сапрону, махнуўшы рукой у другі канец вёскі:

— Пайду.

Не даходзячы школы, на выгане сустрэў мужчын. Па перадзе, з рыжаю справаю пад пахаю, шырока ставячы ногі, ішоў старшыня сельсовета Мунька. Ён усміхнуўся Ютку, які сышоў са сцежкі у снег, глыбей засунуў рукі ў кішэні і, мусіць, нешта сказаў пра яго новаму сакратару партыйнай ячэйкі. Той азірнуўся, нешта адказаў Муньку. За імі ішло тры чалавекі вяскоўцаў.

Ззаду ішоў Змітрок. Шырокі ў плячах, нават крышку згорблены ад таго, што холадна на дварэ. Кіўнуўшы галавою, ён падміргнуў Ютку:

— Заварочвай аглоблі. Бенсяў пойдзем кулачыць. Сукіным сынам крэст паставім.

Ютка драбязіў поруч з Змітром, гамонячы з ім пра калгасныя справы.

На вуліцы то там, то сям з'яўляліся людзі. Калі брыгада апынулася каля Бенсавай брамы, лёгка скрыпаючы лапцямі па снягу, падышоў Сапрон да Мікіты.

— Ютка пашоў варыўню забіраць ад Бенся. Глядзі, онё.

Стары ўзіраўся ў канец, калі мужчыны зайшлі ў двор, і мабыць, нічога не бачыў.

Пакуль усе увайшлі, праз адчыненыя дзверы, клубамі кувыляючыся па падлозе да самае печы, у хату цякло марознае паветра. Старая Бенсіха сядзела ў запечку, калыхалз дзіця.

— Дзверы зачыняйце! Не бачыце —дзіця прастудзіцца! — бяззубымі сківіцамі прашамкала старая.

— А дзе гаспадары? — кладучы справу на стол, сказаў Мунька.

Спужаўшыся увайшоўшых, шарахнулася ў бок цыбатымі нагамі цялё, разліўшы малако, якім паіла яго Бонікава жонка.

— Зараз прыдуць,— сказала яна, устаючы з калодачкі. Стаяла, апусціўшы рукі, не ведаючы, за што ўзяццч.

— Мы можам і абчакаць,— сказаў Змітрок, мерачыся сесці ў крэсла з выгінастымі більцамі спінкі.— А ты, Ютка, ідзі закуры.

— От і гаспадар,— сказаў Мунька, убачыўшы увайшоўшага Бенся.— Хадзі бліжэй да стала.

Бенсь узапёрся пасінелымі рукамі на ўскрай стала, пазіраў на Муньку, які гаварыў, чаго і па што прышлі.

— Зразумела? — запытаўся Мунька. — Зараз дайце ключы, якія у вас ёсць.

Стары, згорбіўшыся, пашоў у другую палавіну. Неўзабаве адтуль вышаў, расчырванелы ўвесь, Бонік.

У дзвярах стаяў збянтэжаны стары Бенсь.

— Не дам ключоў, на гэта права не маеце, — з слінаю вылецела ў Боніка.

— Ці праўда? — устаючы з крэсла паправіў на галаве шапку Змітрок.

— Газеты пішуць што? Культурная гаспадарка, а яны кулака знайшлі.

— Ты па культурнаму і варыўню ў Юткі адабраў, ні за што збіўшы чалавека? Пасядзеў два гады, мусіць мала яшчэ? — перад самым носам у Боніка трос Змітрок аброслым кулаком.— Гэта табе, маць...

— Змітрок, пачакай.

Бонік у прыскрынку шукаў газеты, але Мунька супыніў яго і сказаў, што гэтак было два гады назад, а не цяпер.

— Што тут гаварыць! Звязаць гада, калі брыкаецца, — высунуўся Змітрок.

— Добра кажа, але,— гаманіў каля стала Ютка.— А парабак дзе? Нешта не відаць.

— Дзе парабак? — пад самае вуха запытаў Змітрок у Бенся.

— Учора дамоў пашоў.

— Прагнаў ужо?

— Не, сам пашоў.

Занатурыўся Бонік і ключоў ніяк не даваў. Тросся ад злосці, адгыркваючыся, стаяў каля стала, як воўк, запёрты ў куток. Але пранырлівае вока Пятра, што дагэтуль сядзеў, нічога не кажучы, заўважыла ключы на гратаўцы. Пакуль там гаманілі, ён, п'ючы ваду ў мыцельніку, сцяг ключы ў кішэнь, захіліў полы казінага паўкажушка і сеў каля стала.

— У мяне ключы, брат ты мой, — і перадаў звязак ключоў Муньку.

Бонік, здаецца, памкнуўся быў, каб схапіць ключы, але Змітрок адпіхнуў яго.

— Супакойся!

Той спахмурнеў і, нічога не сказаўшы, вышаў у другую палавіну.

Пачалі апісваць маёмасць. Частка брыгады пашла у клець і хлявы, частка засталася ў сенцах.

— Зараз і самі збірайцеся,— увайшоўшы ў хату, сказаў Мунька.

Змітрок гукнуў Пятра і яны зайшлі ў другую палавіну. Бенсь паволі збіраўся; сеўшы на заслончык каля печы нешта шаптаў увесь час. Бонікава жонка дрыгала нагамі, кінуўшыся тварам у падушкі. Старая залезла на печ, поўзала па чарэні і ўвесь час божкала. Бонік спачатку гразіў, а потым стаў лаяцца.

— Перастань, а то я магу зараз заваліць, калі раскудахтаўся! — гаманіў Змітрок, аглядаючы грамафон.

— Што ты гаворыш з імі гэта ж... — і не скончыў пачатага Бенсь, крэкчучы пяўся ўсцягнуць бот.

Змітрок разглядаў шырокія лапушыстыя лісты вазонаў.

— Як сераўно ў Афрыцы, ці дзе гэта? — пытаў, паказваючы Пятру. Потым хадзіў па хаце і паціраў рукі.

— Што вы збіраецеся, як па сена? На кірмаш вас павязом, не іначай... — не пераставаў Змітрок.

Аформіўшы справу, як належыць, Мунька вышаў на ганак. Пад'ехала падвода.

Спакойна сеў на воз стары, за ім Бонік з пабялелым тварам і старая...

Нявестка не слухала ўгавору, крычала на ўсю хату.

...Пятрок замкнуў хату, зачыніў вароты і астаўся тут на вуліцы ў гурце. Мунька з Васілём паехалі к зяцю Бенся на хутар.

— Варыўню паказваць вязеш? — падміргнуў Сапрон Ютку.

— Ага,— адказаў той і ўкуліўся у развалкі апошняй падводы праводзіць іх да сельсовета.


М-ка Лапічы, Асіпавіцкі раён.


7/Х—33 г